TFM - TRAITÉS FRANÇAIS SUR LA MUSIQUE
Data entry: Peter Slemon
Checked by: Rika Asai
Approved by: Peter Slemon
Fn and Ft: ANODES2 TEXT
Author: Anonymous
Title: Traitié de deschant
Source: Anonymus Traitié de Deschant (Ms. Paris, Bibl. Nat., lat. 14741), ed. Gilbert Reaney, Corpus scriptorum de musica, vol. 36 ([Rome]: American Institute of Musicology, 1996), 69-75. Used by permission.
Graphics: ANODES2 01GF
[-69-] ANONYME
TRAITIE DE DESCHANT
Les 13 especes de chant
Chapitre 1
[P3 8v]
Qui veult savoir l'art de deschant, il doibt savoir qu'il sont 13 especes de chant, c'est assavoir: unisson, demiton, ung ton, ton et demi, deulx tons, deux tons et demi, trois tons, trois tons et demi (les quelz font une quinte), demiton avec quinte, ton avec quinte, ton et demi avec quinte, deux tons avec quinte, deux tons et demi avecque quinte (les quelx font une double).
Unisson est quant la teneur et le deschant sont tout en une regle ou espace, come ycy:
Exemple 1
[CSM36:69] [ANODES2 01GF]
Demi ton est entre mi et fa simplement a chanter. Ou quant on restreint ung ton par maniere divisée, si come la sol la ou sol fa sol, la note moyenne est soutenue de demie ton par la force d'ung [sqb] quarre qui est assis par devant, et le prononchon come fa mi fa. Quar en quelconque lieu que b ront est assis, il convient dire fa, tant en plaint chant come en deschant; et ou [sqb] quarre soit assis, il convient dire mi ou son qu'il le vaille. Quar b ront et [sqb] quarre sont fais pour faire d'un ton demi ton et d'un demi ton ung ton.
Ung ton est entre toutes notes exepté mi fa, si comme ut re mi fa sol la et e converso.
Ton et demi ton est entre re fa et mi sol tant seullement, et e converso.
Deux tons sont entre ut mi et fa la, et e converso.
Deux tons et demi sont entre ut fa, re sol, mi la, et e converso.
[-70-] Trois tons sont entre le fa de F fa ut et le mi de b fa [sqb] mi, et ainsi ailleurs la ou ils pourroyent estre trouvés.
Trois tons et demi sont entre ut sol, re la, les quelz font une quinte, ou entre le mi de E la mi et le mi de b fa [sqb] mi, et e converso.
Demi ton avuec quinte est entre le re de D sol re et le fa de b fa [sqb] mi.
Un ton avec quinte est entre le ut de C fa ut et le la de a la mi re, ou entre le re de D sol re et le mi de b fa [sqb] mi.
Ton et demi avec quinte est entre le ut de C fa ut et le fa de b fa [sqb] mi.
Deux tons avuec quinte sont entre le ut de C fa ut et le mi de b fa [sqb] mi.
Deux tons et demi, lez quelz font une double, sont entre le ut de C fa ut et le fa de c sol fa ut.
Les 13 acors
Chapitre 2
[P3 8v]
Encore est a savoir que de ces 13 especes devant dites sont fais 13 acors: 3 parfais et 4 imparfais et 6 dissonans. Les 3 parfais sont unisson, quinte et double. Les imparfais sont deux tierces et 2 sixtes. Les 6 dissonans sont 2 secundes, 2 quartes et 2 septimes.
Demi et un ton sont 2 secundes. Ton et demi et 2 tons sont 2 tierces. Deux tons et demi et 3 tons sont 2 quartes. Deux tons et ton et demi avuec quinte sont 2 septimes. La tierce de ton et demi ton requiert unisson apres li, et celle de deux tons quinte apres li. La sixte de demi ton avuec quinte requiert apres li quinte, et celle d'un ton avuec quinte requiert double apres li.
Qui veult prendre double contre sa teneur, il doist dire contre ut fa, contre re sol, contre mi la, 8 notes desus sa teneur ou que soit; et autel contre fa sol la comme contre ut re mi, car fa sol la est reputés [-71-] pour ut re mi. Qui veult prendre quinte contre sa teneur, il doist dire contre ut sol, contre re la, ou tout ainsi comme la teneur, 5 notes desus.
Qui veult prendre tierce, il doist dire contre ut mi, contre re fa, contre mi sol, contre fa la, et le contraire, 3 notes desus ou desoubz. Qui veult prendre sixte, il doist dire contre ut re ou la, contre re mi, contre mi fa, contre fa sol, contre sol la, 6 notes desus sa teneur.
Comment le deschant doit commenchier et finer, et des acors moyens
Chapitre 3
[P3 9]
Qui veult faire bon deschant, il doist commenchier et finer par acort parfait, c'est ascavoir par unisson, quinte ou double. Il doist regarder comme la teneur se gouverne: se elle monte a son commencement, si comme ut re mi et cetera, la premiere doist estre double; et se la teneur descent, si comme re ut ou mi ut ou la fa ou la sol, la premiere doist estre quinte, mes que ce soit sur notes appendans. Et ne doist on point faire ne dire 2 quintes ne deux doubles l'une apres l'autre, ne monter ne descendre avuec sa teneur, car il sont parfais. Mais par acors imparfais, tierces ou sixtes, peut on bien monter ou descendre 2 ou 3 notes ou plus se besoing est, mes que ce soit sur notes appendans. Car il sont 3 manieres de notes, c'est ascavoir appendans, non appendans et desirans appendans.
Notes appendans sont comme yci:
Exemple 2
[CSM36:71] [ANODES2 01GF]
sur les quelles on doist dire tierce-quinte ou sixte-double, tant en commencement de chant comme en moyen. Item:
[-72-] Exemple 3
[CSM36:72,1] [ANODES2 01GF]
sur les quelles on doit dire quinte-double ou tierce-quinte.
Notes non appendans:
Exemple 4
[CSM36:72,2] [ANODES2 01GF]
sur les quelles on doibt dire double-quinte ou quinte-tierce. Item:
Exemple 5
[CSM36:72,3] [ANODES2 01GF]
sur les quelles on doibt dire double-tierce, et cetera.
Notes desirans appendans sont quand la teneur monte une note ou 2 ou 3 en droit degré, et en la fin soit une appendant; toutes celles par devant sont desirans appendans, si come yci:
Exemple 6
[CSM36:72,4] [ANODES2 01GF]
Se c'est en commencement de chant, la premiere et la darraniere doibt etre double et les maiennes sixtes, ou la premiere et la darreniere quinte et les moiennes tierces. Se c'est en moyen chant, les premieres sont sixtes et les derrenieres doubles, ou les premieres sont tierces et la derreniere quinte. Et ne doibt on faire que 2 ou 3 tierces ou sixtes l'une apres l'autre sans moyen, et cetera.
[-73-] Item, se la teneur monte 3 notes en droit degré ou hors degré sy come ycy:
Exemple 7
[CSM36:73,1] [ANODES2 01GF]
la premiere doibt estre double, la seconde quinte; se c'est fin de chant, la derreniere unisson; se c'est moyen chant, la derreniere tierce.
Se la teneur montoit 4 notes en droit degré come ycy:
Exemple 8
[CSM36:73,2] [ANODES2 01GF]
se c'est fin de chant, double-quinte-tierce-unisson; se c'est moyen, double-quinte-tierce-tierce, ou quinte et les autres tierces.
Item, se la derreniere est hors de degré come ycy:
Exemple 9
[CSM36:73,3] [ANODES2 01GF]
double-quinte-tierce et la derreniere tierce desoubz la teneur, ou la premiere double et les aultres moyennes sixtes et la derreniere tierce; et se c'est fin de chant, la derreniere unnison. En toute ligature montant, se la teneur montoit 5 ou 6 notes entir, on doibt prendre la ordonnance des 3 ou des 4 desus dites, et cetera.
[-74-] Item, se la teneur descendoit 3 notes en droit degré comme ycy:
Exemple 10
[CSM36:74,1] [ANODES2 01GF]
se c'est commencement de chant, double-sixte-double ou quinte-tierce-quinte; se c'est en moyen, sixte-sixte-double ou tierce-tierce-quinte ou tierce-sixte-double, et cetera.
Se c'est hors de degré come ycy:
Exemple 11
[CSM36:74,2] [ANODES2 01GF]
tierce-quinte-double, ou ainsi:
Exemple 12
[CSM36:74,3] [ANODES2 01GF]
tierce-sixte-double.
Se la teneur descendoit 4 notes en droit degré come ycy:
Exemple 13
[CSM36:74,4] [ANODES2 01GF]
se c'est commencement de chant, il y a 3 dechans, c'est assavoir: double-sixte-sixte-double ou quinte-tierce-tierce-quinte ou quinte-tierce-sixte-double. Se c'est en moyen chant, il y a 5 dechans: 3 sixtes et [-75-] la derreniere double, ou trois tierces et la derreniere quinte, ou sixte-double-sixte-double, outierce-quinte-tierce-quinte, ou tierce-tierce-sixte-double. Se la teneur descendoit 5 ou 6 notes, on prent l'ordenance de 3 ou de 4 devant dicte.
Item, en deschant a 3 exceptions, dont la premiere est se la teneur avoit re fa re ou mi sol mi, come ycy:
Exemple 14
[CSM36:75,1] [ANODES2 01GF]
et le deschant fust double-quinte-double, le quel seroit sol fa sol ou la sol la, la note moyenne n'est pas soustenue.
La seconde est se la teneur descendoit 2 tons et demi, come ycy:
Exemple 15
[CSM36:75,2] [ANODES2 01GF]
Se la premiere estoit tierce, il loist et vault mielx descendre une pour avoir quinte que monter 2 pour avoir double, car la tierce est en parchon et en fleurs.
Item, la tierce exception est se la teneur montoit 2 tons et demi, comme ycy:
Exemple 16
[CSM36:75,3] [ANODES2 01GF]
Se la premiere estoit disieme, il loist et vault mieulx monter une pour avoir double que descendre deux pour avoir quinte.
Explicit
![[ANODES2 01GF]](ANODES2_01GF.gif){kind=link}